Alls hafa 70 íslenskir frjálsíþróttamenn tekið þátt í 21 móti á tímabilinu 1946 til 2016

Evrópumeistaramót í frjálsíþróttum var fyrst haldið í Torino á Ítalíu 1934. Mótið var haldið í París 1938 en síðan ekki fyrr en í Osló 1946 og þá sendu Íslendingar stóran hóp keppenda, 10 manns. Mótin voru yfirleitt haldin á fjögurra ára fresti (með undantekningum 1969 og 1971) fram til 2010 en þá var ákveðið að keppt yrði á tveggja ára fresti. Íslendingar sendu 7 til 10 manna hóp á fyrstu fjögur mótin en frá 1962 til dagins í dag hafa keppendur frá Íslandi verið á bilinu 2 til 6. Silfrið hefur tekið saman allan árangur allra keppenda og veður hann gerður aðgengilegur síðar. Hér verða nokkur eftirminnileg atriði tekin fyrir og birtur listi yfir alla íslenska keppendur á EM.

Fjórir Íslendingar hafa unnið til verðlauna

Gunnar Huseby er einn mesti afreksmaður sem Ísland hefur alið. Hann vann gullverðlaun á sínu fyrsta Evrópumeistaramóti í Osló 1946 og kastaði 15,56 m. Fjórum árum seinna vann hann aftur gullverðlaun og nú með yfirburðum, kastaði þá 16,67 m.

Torfi Bryngeirsson vann gullverðlaun í langstökki í Brussel 1950.  Torfi komst líka í úrslit í stangarstökki og þótti líklegur til að ná verðlaunum í báðum greinum. Þar sem úrslitin i þessum greinum fór fram á sama tíma varð hann að velja á milli. Hann valdi langstökkið og vann gullverðlaun með stökki upp á 7,32 m.

Örn Clausen vann silfurverðlaun í tugþraut í Brussel 1950 eftir gríðarlega harða keppni við Ignace Heinrich. Örn var fyrstur eftir fyrri daginn og var keppnin mjög hörð allan tímann en Örn hlaut 6819 stig, aðeins 8 stigum minna en Heinrich. Það vakti mikla athygli þegar Örn sá að hann myndi ekki hafa sigur og hægði á í lokin á 1500 m hlaupinu til að taka í hönd Heinrich og saman fóru þeir yfir marklínuna.

Ég mun aldrei gleyma síðustu
grein tugþrautarinnar, þegar ég
dauðþreyttur fann hönd Íslendingsins
taka um mína, og þar með
gera mér ljóst, að ég væri búinn
að vinna gullið fyrir Frakkland (Heinrich í blaðaviðtali eftir einvígið við Örn)

Vilhjálmur Einarsson er að sjálfsögðu þekktastur fyrir silfurverðlaunin í þrístökki á Ólympíuleiknum 1956. Færri vita að hann vann bronsverðlaun á Evrópumeistaramótinu 1958 í Stokkhólmi, stökk 16,00 m. Þá má geta þess að hann var nálægt verðlaunasæti fjórum árum seinna og varð þá í sjötta sæti.

Íslensku spretthlaupararnir frábærir í Brussel 1950

Það er ótrúlegt að lesa blaðfregnir frá þessum tíma, hver spretthlauparinn á fætur öðrum komst í úrslit og svo komst boðhlaupssveitin í úrslit og var svo sannarlega í baráttunni, varð í 5. sæti á 41,9 sek. og á sama tíma og sveitir Breta og Svía sem urðu í 3. og 4. sæti. Guðmundur Lárusson komst í úrslit í 400 m hlaupi og varð 4. á 48,1 sek. Haukur Clausen komst í úrslit í 100 og varð 5. á 10,8 sek. Ásmundur Bjarnason komst í úrslit í 200 og varð í 5. sæti á 22,1 (21,9 í undanúrslitum). Boðhlaupssveitin var skipuð þeim Finnbirni Þorvaldssyni, Ásmundi Bjarnasyni, Guðmundi Lárussyni og Hauki Clausen.

Frá 1966 hafa 16 konur tekið þátt í EM utanhúss

Hlutur íslenskra frjálsíþróttakvenna hefur verið stór á síðari árum og síðar væri gaman að gera árangri þeirra allra skil hér á síðunni. Blað var brotið 1966 þegar Sigrún Sæmundsdóttir tók þátt og í Aþenu 1969 keppir spretthlauparinn Kristín Jónsdóttir og annar spretthlaupari og grindahlaupari, Ingunn Einarsdóttir, keppti í Helsinki 1971.

Á mótunum 1974 og 1978 keppir engin íslensk kona en1982 keppir Þórdís Gísladóttir í hástökki og á níunda og tíunda áratugnum keppa þær Helga Halldórsdóttir í 400 m grindahlaupi, Martha Ernstsdóttir í 10.000 m hlaupi, Guðrún Arnardóttir í 400 m grindahaupi og Vala Flosadóttir og Þórey Edda Elísdóttir í stangarstökki.

Eftir aldamótin 2000 hafa sex konur tekið þátt, Ásdís Hjálmsdóttir í spjótkasti, Helga Margrét Þorsteinsdóttir í sjöþraut, Kristín Birna Ólafsdóttir í 400 m grindahlaupi, Hafdís Sigurðardóttir í langstökki, Aníta Hinriksdóttir í 800 m hlaupi og Arna Stefanía Guðmundsdóttir í 400 m grindahlaupi

Það var 1966 sem Ísland sendi fyrst konu til keppni. Það var Sigrún Sæmundsdóttir HSÞ sem kepppti í hástökki og fimmtarþraut í Búdapest 1966.

Guðrún nálægt verðlaunasæti og margar komist í úrslit, síðast Ásdís og Aníta

Guðrún Arnardóttir var í hópi bestu grindahlaupara heims um tíma. Á Evrópumeistaramótinu í Budapest 1998 varð í hún 4. í úrslitum í 400 m grindahlaupi á 54,59 sek. Stangarstökkvararnir Vala Flosadóttir og Þórey Edda Elísdóttir náðu að komast í úrslit og á síðasta móti komust Ásdís Hjálmsdóttir og Aníta Hinriksdóttir í úrslit og náðu báðar 8. sæti. Ásdís komst einnig í úrslit 2010 og varð þá í 10. sæti.

Alls 70 keppendur fyrir Ísland

Það eru alls 70 Íslendingar sem keppt hafa á EM í frjálsum utanhúss. Ásdís Hjálmsdóttir hefur oftast tekið þátt og í Berlín keppir hún á sínu sjötta móti. Aníta Hinriksdóttir er að keppa á sínu þriðja móti, Guðni Valur í annað sinn en Sindri Hrafn í fyrsta sinn.

Aníta Hinriksdóttir	2014, 2016	800
Arna Stefanía Guðmundsdóttir	2016	400 m grindahlaup
Ásdís Hjálmsdóttir	2006, 2010, 2012, 2014, 2016	spjótkast
Ásmundur Bjarnson	1950, 1954	100, 200, 4×100
Bjarni Stefánsson	1971	100
Björgvin Hólm	1958	tugþraut
Björn Margeirsson	2006	800
Björn Vilmundarson	1946	langstökk
Einar Daði Lárusson	2012	tugþraut
Einar Vilhjálmsson	1982, 1986, 1990	spjótkast
Elías Sveinsson	1978	tugþraut
Erlendur Valdimarsson	1969, 1971	Kringlukast, sleggjukast
Finnbjörn Þorvaldsson	1946, 1950	100, 200, 4×100
Guðmundur Hermannsson	1969	kúluvarp
Guðmundur Lárusson	1950	400, 4×100
Guðmundur Sverrisson	2014	spjótkast
Guðmundur Vilhjálmsson	1954	100
Guðni Valur Valsson	2016	kringlukast
Guðrún Arnardóttir	1998	400 m grindahlaup
Gunnar Huseby	1946, 1950, 1958	kúluvarp, kringlukast
Hafdís Sigurðardóttir	2014, 2016	langstökk
Hallgrímur Jónsson	1954, 1958	kringlukast
Haukur Clausen	1950	100, 4×100, tugþraut
Heiðar Georgsson	1958	stangarstökk
Helga Halldórsdóttir	1986	400 m grindahlaup
Helga Margrét Þorsteinsdóttir	2010	sjöþraut
Hilmar Þorbjörnsson	1958	100
Hreinn Halldórsson	1974, 1978	kúluvarp
Ingunn Einarsdóttir	1971	100 m grindahlaup
Íris Grönfeldt	1986	spjótkast
Jóel Sigurðsson	1946, 1950	spjótkast
Jón Arnar Magnússon	1994, 1998, 2002	tugþraut
Jón Diðriksson	1978, 1982	800,1500
Jón Ólafsson	1946	kringlukast
Jón Þ. Ólafsson	1962, 1966	hástökk
Kári Steinn Karlsson	2014	maraþon
Kjartan Jóhannsson	1946	400, 800
Kristinnn Torfason	2012	langstökk
Kristín Birna Ólafsdóttir	2010	400 m grindahlaup
Kristín Jónsdóttir	1970	100
Kristleifur Guðbjörnsson	1962	3000 m hindrunarhlaup
Magnús Jónsson	1950	800
Martha Ernstsdóttir	1990, 1994	10000
Oddur Sigurðsson	1982	400
Óðinn Björn Þorsteinsson	2010, 2012	kúluvarp
Óliver Steinn	1946	langstökk
Óskar Jakobsson	1978	kringlukast
Óskar Jónsson	1946	800, 1500
Pétur Einarsson	1950	800, 1500
Pétur Guðmundsson	1990,1994, 1998	kúluvarp
Pétur Rögnvaldsson	1958	tugþraut
Sigrún Sæmundsdóttir	1966	hástökk, fimmtarþraut
Sigurður Einarsson	1986, 1990, 1994	spjótkast
Sigurður Matthíasson	1990	spjótkast
Skúli Guðmundsson	1946	hástökk
Skúli Thorarensen	1954	kúluvarp
Stefán Hallgrímsson	1974	tugþraut
Stefán Sörensen	1946	þrístökk
Svavar Markússon	1958	800, 1500
Torfi Bryngeirsson	1950, 1954	langstökk, stangarstökk
Trausti Stefánsson	2012	400
Vala Flosadóttir	1998, 2002	stangarstökk
Valbjörn Þorláksson	1958, 1962, 1966	stangarstökk
Vésteinn Hafsteinsson	1990, 1994	kringlukast
Vilhjálmur Einarsson	1954, 1958, 1962	þrístökk
Vilmundur Vilhjálmsson	1978	100,200
Þorsteinn Ingvason	2010	langstökk
Þórdís Gísladóttir	1982	hástökk
Þórður B. Sigurðsson	1954	sleggjukast
Þórey Edda Elísdóttir	1998, +2002	stangarstökk