FH-ingurinn Irma Gunnarsdóttir stórbætti Íslandsmetið í þrístökki innanhúss á Stökkmóti FH sem fram fór í Kaplakrika um helgina. Irma stökk lengst 13,13m og bætti þar með 25 ára gamalt met Sigríðar Önnu Guðjónsdóttur um 30 sentímetra.
Irma átti frábæra stökkseríu og bætti Íslandsmetið í þrígang. Irma stökk 12,87m strax í fyrstu umferð og bætti met Sigríðar Önnu um 3cm. Annað stökk hennar var ógilt en það þriðja mældist 13,10m og var bæting á nokkurra mínútna meti Irmu um 23cm. Fjórða stökkið var ógilt en það fimmta mældist 13,13m og þriðja bætingin á Íslandsmetinu staðreynd. Sjötta og síðasta stökk Irmu reyndist ógilt.
Irma situr nú í fimm af tíu efstu sætum listans yfir bestan árangur kvenna í þrístökki innanhúss frá upphafi. Innanhússtímabilið er rétt að byrja og er Irma því til alls líkleg á komandi mótum. Íslandsmetið utanhúss er 13,18m og er í eigu Sigríðar Önnu.
Nafn | Félag | Árangur | Ár | |
1 | Irma Gunnarsdóttir | FH | 13,13m | 2022 |
2 | Sigríður Anna Guðjónsdóttir | HSK | 12,83m | 1997 |
3 | Jóhanna Ingadóttir | ÍR | 12,80m | 2009 |
4 | Irma Gunnarsdóttir | FH | 12,75m | 2022 |
5 | Irma Gunnarsdóttir | Breiðablik | 12,70m | 2021 |
6 | Jóhanna Ingadóttir | ÍR | 12,68m | 2012 |
7 | Sigríður Anna Guðjónsdóttir | HSK | 12,67m | 1996 |
8 | Irma Gunnarsdóttir | Breiðablik | 12,66m | 2021 |
9 | Irma Gunnarsdóttir | Breiðablik | 12,62m | 2021 |
10 | Sigríður Anna Guðjónsdóttir | HSK | 12,56m | 1995 |