EM í víðavangshlaupum fór fram í Piemonte á Ítalíu í dag. Hlynur Andrésson var eini keppandi Íslands á mótinu en hann endaði í 55. sæti af þeim 80 keppendum sem komu í mark í karlahlaupinu. Hlaupið var um 10km langt og kom Hlynur í mark á tímanum 31:53.
Þetta er í þriðja sinn sem Hlynur keppir á mótinu en hann lenti í 41. sæti árið 2018 og 39. sæti árið 2019. Hann er eini Íslendingurinn sem hefur tekið þátt í þessu móti sem var fyrst haldið árið 1994.
Brautin var staðsett við kastalann í La Mandria garðinum og innihélt hringurinn sem hlaupinn var m.a. 600m langan kafla með 23m hækkun og lækkun ásamt 50m kafla sem hlaupinn var innanhúss í gegnum kastalann. Karlarnir hlupu sex 1,5km hringi og einn 1km hring. Norðmaðurinn Jakob Ingebrigsten sigraði örugglega á tímanum 29:33 og varði þar með titil sinn frá því í Dublin í fyrra. Bretinn Emile Cairess vann silfur á tímanum 29:42 og Belginn Isaac Kimeli brons á 29:45. Frakkar unnu gull í liðakeppninni, heimamenn silfur og Spánverjar brons.
Konurnar hlupu fjóra 1,5km hringi og tvo 1km hringi – alls 8km. Karoline Grøvdal frá Noregi og Konstanze Klosterhalfen frá Þýskalandi háðu mikla baráttu um gullið. Grøvdal reyndist sterkari á lokametrunum og kom í mark á tímanum 26:25 en Klosterhalfen kom í mark einungis fjórum sekúndum þar á eftir. Grøvdal varði þar með titil sinn frá því í fyrra líkt og Ingebrigsten en hún hefur nú alls unnið til sjö verðlauna í fullorðinsflokki á þessu móti.
Mikil barátta var um bronsið en einungis munaði níu sekúndum á þriðja og níunda sætinu. Löndur Klosterhalfen, þær Alina Reh og Hanna Klein, komu á sama tíma í mark í þriðja og fjórða sætinu (27:19) en Reh var dæmd sjónarmun á undan. Þær þýsku unnu gull í liðakeppninni, Bretar unnu silfur og Írar brons.
Einnig var keppt í blönduðu 4x1500m boðhlaupi. Heimamenn gerðu sér lítið fyrir og sigruðu það eftir frábæran lokasprett hjá Gaiu Sabbatini. Spánverjar unnu silfrið og Frakkar brons. Heildarúrslit mótsins má sjá hér.
